Deklarasyon Para sa Kapayapaan
Magmula pa sa aming mga Ninuno, kaming mga kasapi ng Religious Society
of Friends (Quakers) ay naninindigan para sa mahinahong pamamaraan
tungo sa kapayapaan. Kami ay naniniwala na ang ating Panginoon ay namamahay
sa bawat isa sa atin, kaya't ang pagkitil o supporta sa pagkitil ng
buhay ay mariin naming tinututulan.
Kami ay naniniwala na ang hindi pagkakaunawaan at pag-aaway-away ay matutugunan
sa isang makabuluhang pag-uusap at mahinahong pamamaraan. Ang kinakailangan
lamang ay ang sama-samang paglinang ng ating mga kakayanan at ari-arian
patungo sa kapayapaan. Atin ng napatunayan na ang pinakamabigat na suliranin
man ay natutugunan sa pamamagitan ng ating sama-samang panalangin. Kung
minsan, kinakailangan lamang ng sandaling katahimikan para marinig at
maunawaan ang ipinahihiwatig ng Maykapal.
Wala tayong kalaban. Lahat tayo ay maaaring magbago para sa kabutihan.
Totoo na ang paghahangad ng pangmatagalang kapayapaan ay may kaakibat
na panganib, at naising mapagtagumpayan ang mga kinatatakutan at agam-agam.
Sa pandaigdigang kalakaran kung saan ang "digmaan laban sa terrorista" ang
isinisigaw ng nakararami, kami ay nanatiling taliwas dito…hindi
kami sumasang-ayon sa anumang uri ng digmaan o karahasan.
Ang mapayapang pamamaraan tungo sa kapayapaan ay isang matagal na proceso
na nangangailangan ng masusing pagsisiyasat at malalim na pag-uusap ng
magkabilang panig, patuloy na pagtutol sa mga mapang-aping polisiya at
kalakaran, at higit na pang-unawa sa kasalukuyan mga batas. Ang pinakamabisang
pamamaraan sa mapayapang gawain ay ang maagap na pagsugpo dito. Kinakailangan
na matakwil ang pagkakawatak-watak, ang hindi pagkakapantay-pantay sa
lipunan, pang-aabuso sa kalikasan, at ang iba pang uri ng pang-aapi ay
dapat maialis bago pa tuluyang sumiklab ang di pagkakaunawaan. Sa kabilang
dako, sa pagtatapos ng suliranin ay nangangailangan ng maingat at mabilisang
pagtatayo muli ng mga pisikal na infrastraktura at pagbuhay muli ng pakikipag-ugnayan
sa bawat isa upang maiwasan ang muling pag-aalitan.
Ang pamamaraang mapayapa ay hindi nagbibigay ng kaagarang lunas. Ang
nakakalungkot ay ang katotohanan na sa anumang digmaan, ang mga inosente
ang nauunang nakakaranas ng hirap. Sa kabilang banda, ang pagtatagumpay
ng isang mapayapang pamamaraan ay kalimitang hindi napupuna dahil na
rin sa walang kaguluhang naganap. Isang halimbawa na ang ginawa ng African
Great Lakes Initiative na siyang nangalaga sa mga nakaligtas sa mga karahasang
dulot ng pag-aalitan sa Rwanda at Burundi. Sino ang makapagsasabi na
kung hindi dahil sa panghihimasok ng grupo ay baka patuloy pa ang hidwaan
ng magkabilang panig. Ang tanging nalalaman natin ay ang nagging epekto
nito sa pagbabago ng pananaw ng bawat isang natulungan.
Ang makabagong pakikidigma ay nagdudulot ng higit na pinsala sa mga biktimang
nadaramay lamang. Ito rin ay mapamuksa sa mga gusali at iba pang infrastraktura
na kung saan ang kabuhayan ng mga mamayan ay nakasalalay. Bukod pa rito
ay ang mapaminsalang dulot nito sa kalikasan, ang nagkalat na mga mina,
latak ng uranium at iba pang mapaminsalang kemikal ay nanatili sa lupang
pangsakahan. Ang lalong nakakabahala ay ang gawi ng digmaan na kung saan
sinasanay ang mga mamayan sa pagpatay. Bukod sa ito ay mali, ito rin
ay nakaka-epekto sa kaisipan ng mga taong nakasaksi at nakaranas ng mga
karahasang dulot ng digmaan. Sa madaling salita, ang digmaan ay nakapagdudulot
ng ng kawalang tiwala ng tao at ang pagkasira ng mabuting pagtitinginan
at relasyon.
Ang paghahangad ng kapayapaan ay isang malalim na adhikain. Kung titignan
natin ang kasaysayan, ang ating mga ninuno na siyang nagsulong na mapalaya
ang mga alipin ay siya ring kinutya, subalit ng dahil sa kanilang matibay
na paniniwala ito ay kanilang napagtagumpayan. Katulad nila, kami ay
buong pusong magsusulong na maialis ang ano mang-uri ng karahasan sa
ating lipunan, sa ating pang-araw-araw na pamumuhay, sa kapamilya, kalikasan,
at maging sa ating polisiya. Ang aming adhikain ay maging isang tunay
na mapayapang tahanan ng Maykapal ang ating mundong kinagagalawan.
Buwanan Pagtitipon sa Saint Louis
Religious Society of Friends (Quakers)
Saint Louis, Missouri, USA
Ika-12 ng Pebrero 2006
St. Louis Friends Meeting
1001 Park Avenue
St. Louis, MO 63104
314.588.1122
stlouisfriends@stlouisfriends.org
Forum: